Փաշինյանը փորձում է մանևրել՝ հույսը դնելով գերտերությունների տարաձայնությունների վրա
Սյունիքի մարզի շուրջ իրավիճակը դառնում է ավելի ու ավելի բազմաշերտ․ այն միավորում է ինչպես արտաքին դերակատարների աճող ուշադրությունը, այնպես էլ ներքին քաղաքական առաջնահերթությունները։ Քաղաքական մեկնաբան Հակոբ Բադալյանի կարծիքով՝ վարչապետ Նիկոլ Փաշինյանի գործողությունները պայմանավորված են իշխանությունը պահպանելու ձգտումով, նույնիսկ եթե դրա համար պետք է զիջել բովանդակային և ռազմավարական կարևորության հարցերում։
Նրա խոսքով՝ Սյունիքի միջով ճանապարհի հարցում գոյություն ունեն բազմաթիվ հակասություններ․ ակնհայտ է, որ այդ երթուղու շահագործման կապակցությամբ առկա են մի շարք խոշոր և տարածաշրջանային ուժերի շահերի բախումներ։ Նման պայմաններում, ըստ Բադալյանի, դժվար է սպասել կայուն լուծումների։ Այս ֆոնին Փաշինյանը փորձում է մանևրել տրանսպորտային միջանցքների հարցում՝ այդ մանևրների միջոցով փորձելով ապահովել անհրաժեշտ ճնշում Ադրբեջանի վրա և հասնել խաղաղության պայմանագրի ստորագրման կամ գոնե պարաֆավորման մինչև 2026 թ․ ընտրությունները։
«Փաշինյանի հիմնական նպատակը մանևրի հնարավորության պահպանումն է՝ միևնույն ժամանակ կարճաժամկետ արդյունք ստանալու ակնկալիքով, այդ թվում՝ հնարավոր նախընտրական գործընթացների համատեքստում։ Դրա համար նա պատրաստ է բովանդակային հարցերը ենթարկել սեփական ներքաղաքական տրամաբանությանը։ Հաշվարկը, ամենայն հավանականությամբ, այն է, որ արտաքին դերակատարների միջև եղած հակասությունները հետագայում թույլ կտան խուսափել այժմ ընդունվող կամ քննարկվող որոշումների ուղղակի պատասխանատվությունից։
Սակայն նման տրամաբանությունը չափազանց ռիսկային է։ Հենվելով առկա հակասությունների զսպող գործոնի վրա՝ Փաշինյանը կարող է գնալ լուրջ զիջումների, որոնք՝ փոխադարձ արգելափակման սցենարի տապալման դեպքում, կարող են դառնալ անդառնալի։ Սա լրացուցիչ ռիսկեր է ստեղծում երկրի համար»։