Հայ ազգային կոնգրես կուսակցության փոխնախագահ Արամ Մանուկյանի խոսքով՝ օգոստոսի 8-ին Վաշինգտոնում ստորագրված եռակողմ հռչակագիրն ավելի շատ հարցեր է առաջացնում, քան պատասխաններ է տալիս։
«Այս փաստաթուղթը խաղաղության չի հանգեցնի, քանի որ այն պարունակում է բազմաթիվ խոչընդոտներ և ռիսկեր», — հայտարարել է Մանուկյանը։ Նա վստահ է, որ հաղորդակցությունների բացման և ԵՄ-ի ու ԱՄՆ-ի ֆինանսավորման մասին բոլոր խոսակցությունները բլեֆ են։ «Թրամփի երթուղու» պարամետրերը և ֆունկցիոնալությունը պարզաբանող հիմնական փաստաթուղթ ներկայումս գոյություն չունի և, ամենայն հավանականությամբ, չի լինելու, նշել է Մանուկյանը՝ կրկնելով, որ իրականացման համար կան բազմաթիվ խոչընդոտներ։ «Պնդումները, որ ճանապարհի վերահսկողությունը կիրականացվի հեռակա կարգով՝ սկաներների միջոցով, չեն դիմանում քննադատությանը։ Սա պարզապես մանիպուլյացիա է։ Սահմանին մարդկային ներկայությունը պարտադիր է. մարդկային միջամտությունը անհրաժեշտ է։ Եվ թե ով կիրականացնի վերահսկողությունը այս դեպքում, անհասկանալի է։ Այլ կերպ ասած, ռիսկերն ու հակասությունները գոյություն ունեն հենց ի սկզբանե», — հավելել է նա։
ՀԱԿ փոխնախագահը հավելել է, որ ներկայացված լուծումը միջանցք է, այլ ոչ թե ճանապարհ, և այստեղ խնդիրը ոչ միայն մաքսային ստուգումներ են։ «Կկարողանա՞նք մենք օգտվել այս ճանապարհից։ Որևէ տեղ ամրագրվա՞ծ է այս հնարավորությունը։ Ոչ։ Իսկ եթե մենք չենք օգտվում այս ճանապարհից, ապա դա միջանցք է։ Եթե մենք չօգտագործենք այս ճանապարհը, որքանո՞վ կարող է այն համարվել մեր տարածք», — նշում է Մանուկյանը։ Նա նաև հավելեց, որ Նախիջևանով անցնող ճանապարհից հայկական կողմի օգտվելու հնարավորութան հարցը այլևս չի էլ քննարկվում, այն օրակարգում չկա։
Այս ճանապարհը պետք է դառնար տրանսպորտային հանգույց, նշեց Մանուկյանը՝ համաձայնելով առաջին նախագահ Լևոն Տեր-Պետրոսյանի դիրքորոշման հետ։ «Դրա հիմքերն արդեն դրվել էին Հյուսիս-Հարավ մայրուղու շինարարության մեկնարկով։ Այս մայրուղու շինարարությունը պետք է ավարտվեր դեռ 2015 թվականին։ Հիմա, եթե Արևմուտք-Արևելք մայրուղին էլ սկսեր շահագործվել, Հայաստանը կդառնար տրանսպորտային հանգույց, կենտրոն։ Այս դեպքում քաղաքականությունն ավելի հավասարակշռված կլիներ, տնտեսական օգուտները՝ շոշափելի», — հայտարարեց Մանուկյանը։