Իրանի շուրջ ընթացող զարգացումները ներկայումս էական առաջընթաց չեն արձանագրում և, ըստ էության, գտնվում են «լճացած» վիճակում։ Այս մասին նշում է իրանագետ Վարդան Ոսկանյան՝ անդրադառնալով տարածաշրջանային վերջին գործընթացներին։
Նրա խոսքով՝ թեև Թեհրանից և Վաշինգտոնից շարունակվում են կոշտ և փոխադարձ հայտարարությունները, իրական քաղաքական հարթությունում տեսանելի նոր զարգացումներ առայժմ չկան։
Ոսկանյանի փոխանցմամբ՝ տարբեր տեղեկատվական արտահոսքեր որոշ պատկերացում են տալիս կողմերի միջև Իսլամաբադում կայացած բանակցությունների մասին։
Ըստ այդ տվյալների՝ հիմնական տարաձայնությունը վերաբերում է Իրանի միջուկային ծրագրի շուրջ ժամկետներին։ Իրանը պատրաստակամություն է հայտնել հինգ տարով դադարեցնել ուրանի հարստացումը, մինչդեռ ԱՄՆ-ը պնդել է առավել երկար՝ քսան տարվա սահմանափակման տարբերակը։
Իրանագետը նշում է, որ իրանական կողմը չի համաձայնել նաև իր արդեն 60 տոկոս հարստացված ուրանի պաշարները փոխանցել որևէ երրորդ երկրի։
Միևնույն ժամանակ, Թեհրանը պատրաստակամություն է հայտնել նվազեցնել հարստացման աստիճանը, սակայն այս առաջարկը չի բավարարել ամերիկյան կողմին, ինչը ևս խորացրել է տարաձայնությունները։
Ոսկանյանի գնահատմամբ՝ բանակցությունների ընթացքում քննարկվել է նաև Հորմուզի նեղուցի հարցը։
Ըստ նրա՝ ԱՄՆ-ը հավանաբար առաջարկել է նեղուցի համատեղ կառավարում, սակայն Իրանը մերժել է այդ մոտեցումը՝ ընդգծելով, որ այն իր ռազմավարական շահերի գոտին է։
Ամփոփելով՝ Վարդան Ոսկանյան նշում է, որ ներկայումս գործընթացը գտնվում է փակուղային փուլում․ կողմերը շարունակում են կոշտ դիրքորոշումներ պահպանել, իսկ փոխզիջման հիմքեր առայժմ չեն ձևավորվել։