Մինսկի խումբը չի կարող լուծարվել Հայաստանի և Ադրբեջանի դիմումի հիման վրա։ Այս մասին հայտարարել է «Մոդուս Վիվենդի» վերլուծական կենտրոնի ղեկավար Արա Պապյանը։
Նա ընդգծել է, որ Մինսկի խումբը ստեղծվել է 57 երկրների կոնսենսուսով, և այն պետք է լուծարվի նույն ընթացակարգով։ Ուստի այս պահի դրությամբ խոսել Մինսկի խմբի շուտափույթ լուծարման մասին վաղաժամ է։
Իհարկե, Վաշինգտոնում կայացած հանդիպման ժամանակ ԱՄՆ նախագահ Դոնալդ Թրամփը նույնպես կոչ արեց ԵԱՀԿ երկրներին լուծարել Մինսկի գործընթացը և դրա շրջանակներում ստեղծված կառույցները։ Սա կարելի է դիտարկել որպես անդամ երկրների վրա մի տեսակ ճնշում, որը, անկասկած, որոշակի ազդեցություն կունենա։ Այնուամենայնիվ, Պապյանը վստահ է, որ 57 երկրների կոնսենսուսի հասնելը չափազանց դժվար կլինի.
«Ինչ-որ մեկը անպայման կքվեարկի դրա դեմ՝ դա կարող է լինել Կիպրոսը, Հունաստանը Շվեյցարիան և, հնարավոր է, նույնիսկ Ռուսաստանը։ Նախկինում Մոսկվան պաշտպանում էր Մինսկի խմբի լուծարումը, քանի որ ակնկալում էր, որ ամբողջ գործընթացը կընթանա իր վերահսկողության տակ, և ինքը կդառնա միակ խաղացողը։ Այժմ,նախաձեռնությունն անցել է Վաշինգտոնի ձեռքը, և Ռուսաստանը կկորցնի իր ազդեցության վերջին գործիքը, եթե Մինսկի խումբը լուծարվի: Իսկ հաշվի առնելով Բաքվի հետ առաջացած լարվածությունը՝ այս գործիքը ՌԴ-ին անհրաժեշտ է: Այսպիսով՝ Հայաստանի և Ադրբեջանի կարծիքը, անշուշտ, կարևոր է, բայց առանց 57 երկրների համաձայնության, անհնար է հասնել Մինսկի խմբի լուծարմանը»:
Պապյանը նաև նշեց, որ Մինսկի խմբի լուծարումը կունենար չափազանց բացասական հետևանքներ հայկական կողմի համար: Այս 57 երկրները, լինելով գործընթացի մասնակիցներ, հնարավորություն ունեն բարձրացնելու հարցերի լայն շրջանակ՝ հայերի Արցախ վերադարձից մինչև հայկական մշակութային և կրոնական հուշարձանների ոչնչացման խնդիրները: Մինսկի խմբի լուծարումից հետո նման հնարավորությունները կսահմանափակվեն, և այս հարցերին անդրադառնալ ցանկացող երկրները ստիպված կլինեն հղում կատարել այլ միջազգային փաստաթղթերի: Սակայն ամենակարևորը դա չէ.
«Ամենամեծ վտանգը կայանում է նրանում, որ կոնսենսուսով Մինսկի խմբի լուծարումը իրականում կնշանակեր, որ բոլոր 57 երկրները համաձայն են՝ Արցախի հարցը փակված է», — նշում է Պապյանը։