Բաքուն երբեք չի կնքի Հայաստանի հետ խաղաղության պայմանագիր։ Հայաստանի նկատմամբ Ադրբեջանի հավակնությունները շարունակական են լինելու, նրանք երբեք չեն դադարի: Նման կարծիքի է միջազգայնագետ Արմեն Մանվելյանը։
«Բոլոր այն հայկական ազգանուններով մարդիկ, ովքեր գալիս են և պնդում են, որ Ադրբեջանը մեզ խաղաղություն է բերում, իմացեք՝ այդ մարդիկ դավաճաններ են, իրենք հետապնդում են անձնական շահեր հնարավոր է՝ ֆինանսական օգուտներ», — նշեց Մանվելյանը։
Ըստ նրա, այս կեղծ խաղաղության «փուչիկը» վաղ թե ուշ պայթելու է: Այս պահի գործողությունները, մասնավորապես կեղծ խաղաղության քարոզը, հետապնդում է մեկ նպատակ՝ ընտրություններին վերարտադրվել՝ մարդկանց խաբելով, թե իբր իրենք խաղաղություն են բերում:
Մանվելյանը կոչ արեց չմեռանալ, որ այսօր խաղաղություն քարոզող թիմ պատերազմ, ավեր ու գաղթ է բերել:
«Մոտավորապես 100-ից ավելի հայկական եկեղեցիներ են նվիրել թուրքերին, տասնյակ քաղաքներ և գյուղեր են նվիրաբերել թուրքերին: Մեր եկեղեցիները այսօր ավերվում, քանդվում են Արցախում: Բայց այս մարդիկ խոսում են ինչ-որ բարոյականության մասին և իբրև թե մտածում են Հայաստանյաց Առաքելական Եկեղեցու մասին: Մինչդեռ այդ եկեղեցու ամենակարևոր թեմերից մեկը՝ Արցախի թեմը, որը հազարամյակներ շարունակ (մոտավորապես 1700 տարի) հայկական է եղել, այսօր արդեն թուրքական տիրապետության տակ է», — նշեց փորձագետը:
Սևանա լճի հետ կապված Ալիևի խոսույթը, շարունակեց փորձագետը, գալիս է հաստատելու՝ ադրբեջանական հավակնությունները կանգ չեն առնելու․
«Սա կոնկրետ հավակնություն է Հայաստանի տարածքի նկատմամբ: Նրանք ոչ մի վայրկյան չեն պատրաստվում հրաժարվել այդ հավակնություններից, ոչ մի վայրկյան չեն պատրաստվում ճանաչել այսպես կոչված սովետական Հայաստանի սահմանները, որոնց մասին ժամանակ առ ժամանակ խոսում է այսօրվա վարչախումբը: Նրանց հավակնությունները ոչ միայն Սևանի, այլ նաև ավելի խորքային են՝ առաջին հերթին Սյունիքի նկատմամբ, հատկապես այսպես կոչված «Թրամփի ուղու» կամ Զանգեզուրի միջանցքի ուղղությամբ: Այսինքն՝ նրանց հավակնությունները շարունակական են լինելու, երբեք չեն դադարի: Դա պետք է հստակ հասկանալ»:
Մանվելյանը համոզված է՝ Բաքուն երբեք չի կնքի խաղաղության պայմանագիրը․
«Նրանց նպատակը խաղաղությունը չէ: Նրանց նպատակը Հայաստանին հնարավորինս թուլացնելն ու ոչնչացնելն է: Այդ իսկ պատճառով, բոլոր նրանք, ովքեր ադրբեջանցիների անունից գալիս են և խոսում են խաղաղության մասին հերթական ցեղասպանության ճանապարհ են հարթում», — նշել է նա:
Մանվելյանը հիշեցրեց, որ 1915 թվականի Ցեղասպանությունը այս նույն սցենարով էր ընթանում:
«Երբ 1908 թվականին երիտթուրքերը եկան իշխանության, հազարավոր ինքնահռչակ հայ մտավորականներ գնում էին հայկական գյուղերը՝ Սասուն և այլուր, ասում էին՝ «վերջ, ամեն ինչ վերջացել է, հիմա արդեն խաղաղություն է լինելու: Սրանք նոր թուրքեր են՝ Սորբոնում, եվրոպական կրթությամբ թուրքեր»: Համոզում էին, որ ֆիդայիները իջնեն սարերից և զենքերը հանձնեն: Ցավոք, շատերը հավատացին դրան: Ինչով վերջացավ՝ մենք գիտենք», — ասաց նա:
Հիմա․ ըստ Մանվելյանի, տեղի է ունենում բառացիորեն նույն սցենարը: