Վենեսուելայում տեղի ունեցած վերջին զարգացումները կարող են լինել Միացյալ Նահանգների նախագահ Դոնալդ Թրամփի կողմից իրականացվող ավելի լայն ռազմավարության մաս, որի հիմնական թիրախներից մեկը Իրանն է: Նման կարծիքի է քաղաքագետ Ռոբերտ Մարգարյանը։
Նա նշեց, որ անցյալ տարի Վաշինգտոնը ակտիվ փորձեր էր ձեռնարկում նվազեցնելու Իրանի տարածաշրջանային դաշնակիցների ազդեցությունը՝ Հեզբոլլահը Լիբանանում, Համասը Գազայում և հուսիթները Եմենում: Հիմա Վենեսուելան, որպես Իրանի տնտեսական կարևոր գործընկեր, հայտնվել է ԱՄՆ վերահսկողության ներքո, ինչը լուրջ տնտեսական հարված է հասցնում Թեհրանին:
Վենեսուելան և Իրանը խոր տնտեսական կապեր ունեին դեռևս Հյուգո Չավեսի ժամանակներից, այս համագործակցությունը շարունակվել է նաև Նիկոլաս Մադուրոյի օրոք: Իրանը մեծածավալ ներդրումներ է կատարել Վենեսուելայի նավթարդյունաբերության ոլորտում՝ նավթի դիմաց ապրանքների փոխանակման սխեմայով: Այժմ այդ ներդրումները, որոնց արժեքը գնահատվում է 2-3 միլիարդ դոլարի շրջանակում, կորցրել են իրենց արժեքը, քանի որ Վենեսուելան անցել է ԱՄՆ-ի ազդեցության տակ: Սա ոչ միայն ֆինանսական կորուստ է Իրանի համար, այլև խաթարում է նրա տնտեսական ռազմավարությունը տարածաշրջանում:
Մարգարյանը կարծում է, որ Վենեսուելայի դեպքը կարող է լինել միայն նախաբանը ավելի մեծ գործողությունների, որոնց թիրախում կարող են հայտնվել նաև այլ երկրներ, այդ թվում՝ Իրանը: Թեև Թրամփը բազմիցս զգուշացրել է Իրանին, որ եթե Թեհրանը բռնի ուժ կիրառի ներքին բողոքի ցույցերը ճնշելու համար, ԱՄՆ-ը կմիջամտի՝ պաշտպանելու ցուցարարներին, սակայն, Մարգարյանի գնահատմամբ Վենեսուելայի սցենարը Իրանում կրկնելը բարդ է, քանի որ Իրանի տարածքային և ռազմական առանձնահատկությունները դժվարացնում են նման գործողությունները: Այդուհանդերձ Թրամփի անկանխատեսելիությունը, որը դրսևորվել է նախկինում, օրինակ՝ Իսրայելի հետ կապված գործողություններում, թույլ չի տալիս բացառել որևէ տարբերակ, նշում է փորձագետը: