Գլխավոր դատախազ Աննա Վարդապետյանի որոշումը դիմել ԱԺ նախագահին՝ միջնորդելով քրեական գործ հարուցել «Հայաստան» ընդդիմադիր խմբակցության ղեկավար Սեյրան Օհանյանի և նույն խմբակցության քարտուղար Արծվիկ Մինասյանի նկատմամբ, քաղաքական դաշտում լայն արձագանք է ստացել։ Այս քայլը շատերի կողմից դիտարկվում է որպես իշխանության կողմից ընդդիմությանը սահմանափակելու հնարավոր գործիք՝ հատկապես հաշվի առնելով նախկինում նմանատիպ գործընթացների պատմական համատեքստը։
Արծվիկ Մինասյանը, արձագանքելով այս զարգացումներին, հայտարարեց, որ սա ոչ թե իրավական գործընթաց է, այլ քաղաքական շոու, որի նպատակն է վախեցնել ընդդիմադիր գործիչներին։ Նա ընդգծեց, որ իր դեմ հարուցված քրեական գործը որևէ իրավական հիմնավորում չունի և որ այս գործողությունները վկայում են իշխանության անհանգստության մասին։
❗️Գլխավոր դատախազի միջնորդությունը ընդդիմադիր գործիչների դեմ քրեական գործ հարուցելու վերաբերյալ տեղի է ունենում այն պահին, երբ երկրի քաղաքական իրավիճակն առանձնանում է մեծ լարվածությամբ։ Պետական իշխանության վարկանիշի անկման ֆոնին և առաջիկա ընտրություններին ընդառաջ, իշխանությունը իրական գրոհ է սկսել իր ընդդիմախոսների դեմ։ Ընդ որում ընդդիմախոսների շարքում հայտնվեց ոչ միայն քաղաքական ընդդիմությունը, այլ նաև Եկեղեցին։
❗️Հատկանշական է նաև այն հանգամանքը, որ դատախազությունը օպերատիվորեն «գործ գտավ» հենց այն պահին, երբ ընդդիմությունը, կարծես, եկավ ընդհանուր հայտարարի իմպիչմենտի գործընթացի հարցի շուրջ։ Հաշվի առնելով ընդդիմության ներկայիս թույլ դիրքերը՝ դժվար թե իշխանությունները անկեղծորեն հավատան, որ վերջինս կարող է իմպիչմենտի գործընթացը հասցնել տրամաբանական ավարտի: Այդուհանդերձ, գլխավոր դատախազի գործողությունները, որոնք ակնհայտորեն պայմանավորված են վերևից ստացված հրահանգներով, վկայում են իշխող վերնախավի նկատելի անհանգստության մասին:
Ինչո՞վ է պայմանավորված այս անհանգստությունը: Ինչո՞ւ է իշխանությունը, չնայած ընդդիմության բազմաթիվ անհաջողություններին, ջանքեր գործադրում՝ ի սկզբանե խափանելու իմպիչմենտի գործընթացը: Պատճառը, ամենայն հավանականությամբ, կայանում է իշխող վերնախավի՝ Հայ Առաքելական Եկեղեցու դեմ ուղղված ծրագրերում: